淘宝爆新型“退款骗局”！假客服诱转账随时清空账户 官方揭4大防线

Mandyyy

吹水

網民中招平機票騙案‼️即教大家網上買機票✈️防騙7大貼士💡

上Threads見到有網民因低價機票虛假廣告而受騙,造成4位數港元損失｡🥲網民亦表示自己第一次買機票,經驗不足,岀｢警世文｣,希望大家小心受騙‼️該貼文目前高達過百萬瀏覽次數｡ 💡有見及此,我亦為大家整合資料,最後教大家防騙7大貼士,記得睇到最後! 來源: Threads,永安旅遊,Canva #熱話#吹水八卦#UCreatorHK#好人好事#攻略#旅遊#旅行#平機票

dinodaddy

吹水

香港

得啖笑 (12) - 自助取件的“進步”

依家退休，我變咗我老婆嘅專屬 Assistant。有一日，老婆遞部手機埋嚟：「我有一件淘淘貨，下晝幫我去菜x驛站攞件。」 我當然冇問題啦! 出街行下當做運動啫。其實自從有咗拼xx免費直送上門，都好耐未去過攞件，心情反而有點興奮。 點知去到間驛站門口，我成個人呆咗。 ***畫面係點？ 入面密密麻麻全部係架，上面擺滿咗成千個包裹。 牆上寫住：「請看地下指示，自行進內按編號取件」。 奇就奇在，以前負責搵貨俾你個「職員」仲坐喺度，但他面口黑過包公，雙手盤胸，用一種「眾生皆苦」嘅眼神望住你。 那一刻，我突然明白：「乜嘢叫化境？化境就是，你明明喺度，但人哋當你唔存在；或者，人哋明明喺度，但你自己執生。」 喺呢個驛站入面，職員嘅功能已經進化成一個「監考官」。你要自己做倉務員，而佢，負責喺你搵唔到包裹嗰陣用眼神鄙視你。 ***尋找「1-3-0428」的修行 我要攞嘅包裹，個編號叫1-3-0428。 當我行入去嗰堆貨架嘅時候，我發現自己好似入咗個「大型密室逃脫」遊戲。周圍嘅人，每個手上都拿著一部手機，神情凝重，好似拆緊炸彈咁。 * 1 號架： 搵到喇。 * 第 3 層： 都搵到。 * 0428…… 那一刻，我發覺隔壁有個細路，佢身材比較矮小，我哋對望咗一眼。佢著住校服，背囊大過佢個人，雙手捧住部 iPhone，喺密密麻麻嘅貨架下穿梭。 我心諗：「呢度係成年人嘅場。你一個小學雞，編號咁複雜，你點會明啊？等阿叔盡顯男兒本色幫下你。」我帶著慈祥而專業嘅笑容，微微彎下腰，正想開口同佢講：「使唔使幫你……」 「幫」字都未全吐出嚟，說時遲那時快！只見個細路突然一閃，好似特務開竅咁，身手敏捷到直情有殘影！順著個貨架嘅鐵邊一踩、借力一彈，然後右手精準無誤、乾脆俐落咁喺高層入面，「唰」一聲，直接扯咗個小包裹落嚟！ 我伸出去想「幫忙」嘅手，尷尬地懸空在半空中。 細路穩穩落地，懶型咁揈一揈個包裹：「阿叔，借借。」 那一刻，我直情想跪喺度拜佢為師。我呢班喺社會打滾咗幾十年嘅熟男，結果嚟到驛站，生存技能竟然被一個小學雞秒殺！ ***終極一關：對啱號碼 我終於喺角落頭搵到老婆件貨，好興奮咁拿去門口，諗住可以走人。點知，個黑面職員終於開口，用一種極度機械化、不帶感情嘅聲音講： 「報尾四位電話號碼。」 我即刻報上我個電話：「9123……」 「唔啱! 唔係你個號碼。係收件人號碼。」他冷冷地說。 「收件人？即係我老婆?！」係喎！我今次係幫老婆取件啫，做咩好似自己攞禮物咁嘅? 那一刻，黑面職員忍不住嘆了一口氣。後面排隊嘅開始輕輕拍打自己個大腿，發出「啪、啪、啪」嘅催促聲。 我大聲報出：「xxxx！」然後抱住佢件包裹，絕塵而去。 驛站的終極哲學 我突然覺得，呢個驛站其實好有哲學意味。大家諗下，以前我哋嘅世界係點嘅？ * 以前： 我哋俾錢買服務。去店舖買嘢，有人幫你拎、幫你包、講聲謝謝。 * 依家： 嗰個人仲喺度，但佢唔會幫你。佢嘅存在，係為咗監督你點樣幫自己服務。 呢個世界越「進步」，好似將所有成本同勞力都轉嫁返俾消費者，仲要美其名曰「效率」。 後生仔，甚至連頭先那個細路，都會覺得：「幾方便啊！唔使同人溝通，自己拿完，對個號碼就走得，高效率！」 但呢種「人喺度但唔幫手」嘅制度，令我覺得有一種莫名嘅冷漠。 返到屋企，老婆見到我大汗疊細汗，笑我：「攞個包裹都搞到咁，你真係退化喇!」 我話：「可以嘅話，下次都係用直送門口方便啲!」😅 #情感 #吹水 #生活哲學 #熱話 #驛站 #退休生活 #得啖笑 #自助取件 #退而不休 #香港日常 (此文章由U Blog 同步發佈至社群)

dinodaddy

吹水

得啖笑 (10) - 7天無理由退貨的幻想

我最近喺淘淘，憑住我縱橫商場幾十年、自以為火眼金睛嘅「精明眼」，買咗一個近來是 "香港地區榜-固態硬盤熱銷榜 No. 1" 商店嘅4TB SSD，希望upgrade部電腦行快啲。價錢幾多？300蚊港紙。 ***一場 300 蚊 vs 3000 蚊嘅智商稅*** 大家知唔知而家 2026 年，一個正正常常、寫讀速度合格嘅 4TB SSD 賣緊幾多錢？我去深水埗黃金商場查過，大牌子閒閒地都要3000蚊。 但我當時個腦係點樣運作㗎呢？我當時係處於一種「退休亢奮期」。我心諗： 「香港啲租貴呀嘛！啲代理要過河抽水呀嘛！我而家直接喺源頭搵工廠攞貨，300 蚊買到人哋 3000 蚊嘅嘢，呢啲就係人生經驗！」 最精彩嘅地方係，我睇住嗰個頁面，大大個字寫住：「支持香港退貨，7天無理由退貨」, 而且包退件郵費。我心諗，好彩我仲有呢把尚方寶劍！就算收到件垃圾，我即刻申請退貨，輸打贏要又如何! ***咁容易尋寶咩！*** 結果件貨寄到嚟，我興致勃勃咁插落部電腦度。 嗰個速度呀……我以為部電腦中咗輻射，全線癱瘓。佢唔係 SSD，佢簡直係一個「電子化石」。我 Copy files 入去，條 Progress Bar 郁都唔郁，顯示「剩餘時間：5 天」。 呢個唔係 SSD（Solid State Drive），呢個係 SSS —— Super Slow Snail（超級慢速蝸牛）。 試完隻"蝸牛"之後，我很明顯已經中招! ***退貨關卡才是真的大招*** 我在淘淘即刻申請退貨，竟然很快獲批。然後選定了屋企樓下嘅退貨點，懷著輕鬆的心情，拿著隻"蝸牛"去退貨。點知速遞公司個哥哥望一望件貨，搖搖頭同我講： 「SSD? 電子嘢唔可以香港退貨，過唔到海關，或者要打税申報。你要退？都係自己攞返上去深圳寄啦！」 我當場呆咗。心諗：「點解寄落嚟嗰陣又過到？唔通呢個SSD喺香港住咗幾日，攞咗身份證，所以唔可以隨便返大陸？」 呢個所謂「香港 7 日退貨」，擺明就係玩「灰色地帶」嘅局。佢話畀你聽個app容許你按退貨，但佢無話畀你聽，你要具備衝破重重關卡嘅勇氣同埋金錢、勞力先可以完成呢個動作。 對於一般香港人嚟講，為咗 300 蚊，要坐車去羅湖，排隊過關，再去搵間快遞公司，來來回回，仲要擔心會唔會畀海關沒收……呢件貨「無理由退貨」，其實係有「無限個理由」令你退唔到。 ***退休男嘅「速度感」與「掌控感」*** 我老婆見到我對住張快遞單發呆，佢好冷靜咁行過嚟話： 「算啦，唔係所有貨都咁嘅，今次買個教訓，抵到爛啦。起碼呢舊嘢仲可以當紙鎮，或者攞嚟墊張唔穩嘅枱腳。你唔係最鍾意追求『慢生活』咩？呢個 4TB 硬碟絕對係"慢"生活嘅極致。」 我發現，男人到咗 50 歲，最難受嘅唔係銀包縮水，而係你發現你嘅「江湖經驗」喺呢個新時代嘅某些不良電商陷阱入面，一文不值。你以為你執到寶，其實人哋喺背後笑你係豬。 好! 你搏我冇時間返上深圳? 我而家最唔缺嘅就係時間！反正久不久就上去玩，我決心一定要退，輸人唔好輸陣! 那一刻，我好似英雄本色Mark哥上身，好型咁答我老婆:「我自己唔見咗嘅嘢，我要自己攞返! 搵一日上深圳玩兼退貨!」 再作定一篇千字差評, 中英對照, "回敬"那奸商. 退完錢即post! 😂 (***後記***： 原來退款後不能再給評語, 那只望有缘人看到這blog, 不會像我中招！) 命運, 還是要自己掌控的！😌 #科技 #慢生活 #吹水 #熱話 #退休生活 #智商稅 #淘淘中招 #跨境退貨 #精明眼 (此文章由U Blog 同步發佈至社群)